தடுப்பூசி குறித்த சீமானின் அபாயகரமான நிலைப்பாட்டுக்கு ஒரு சவால்....

தடுப்பூசிகள் தேவையே இல்லை, மரபுவழி மருத்துவமும், சுத்தமான காற்று/நீர்/உணவும் நோய்களில்லாத வாழ்வைத்தரும் என்று திரைப்பட நடிகர் சீமான் தொலைக்காட்சி நிகழ்ச்சி ஒன்றில் சொன்னார். யாரும்  சுத்தமான காற்றும், நீரும், உணவும் வேண்டாம் என்றோ, இவற்றால் பயன் இல்லை என்றோ சொல்ல முடியாது. நம்முடைய பிரச்சனை அதுவல்ல. தடுப்பூசிகள் தேவையில்லை என்று முரண்டு பிடிக்கும் முட்டாள்தனமே நம் பிரச்சனை.

நோய்கள் கண்ணுக்குப் புலப்படாத பாக்டீரியா, வைரஸ் மற்றும் இதர நுண்ணுயிரிகளால் வருவதை அவர் மறுக்கிறாரா? நோய்கள் பலவகைப்படும். பிறவிக்கு குறைபாடுகள், சத்துப் பற்றாக்குறை, உடலில் ஏற்படும் மாற்றங்கள், பரம்பரை வியாதிகள், உணவு/வாழ்க்கை முறையினால் வரும் நோய்கள், தொற்று வியாதிகள் என்று பல உள்ளன. இதில், தடுப்பூசிகள் தொற்று நோய்களையே பெரும்பாலும் தடுக்கின்றன. இப்படி இருக்க, சீமானின் பேச்சு, வாழ்க்கைமுறையினால் வரும் நோய்களைப்போல தோற்று நோய்களையும் உணவு, உடற்பயிற்சி போன்ற வழிகளில் சரி செய்துவிடலாம் என்பது போல உள்ளது.

நாம் சற்று பின்னோக்கிப் பார்த்தால், நம் நாட்டு மரபுவழி மருத்துவங்களில்கூட பல தோற்று நோய்கள் பற்றிய குறிப்புகள் உள்ளன. இந்த நோய்கள் நவீன அறிவியல் மற்றும் செயற்கை உரம்/பூச்சிக்கொல்லி/மாசு ஆகியவை தோன்றும் முன்பே இருந்துள்ளன என்பதற்கு நம் நாட்டு மருத்துவ முறைகளான சித்த/ஆயுர்வேத நூல்களே சான்று. மேலும், வாழ்க்கைமுறை மாற்றங்களால் இன்று நம்மை அதிகம் தாக்கும் நோய்கள்கூட அன்றே இருந்துள்ளன. அவற்றின் அளவு குறைவாக இருந்தது என்பதே சரி. ஆகா, சீமான் சொல்வது சரி என்றால், எதனால் இயற்கையோடு இணைந்து வாழ்ந்த நம் முன்னோர்கள் தொற்று நோய்களுக்கு கொத்துக் கொத்தாக செத்து மடிந்தனர்?

சரி, இப்போது விஷயத்துக்கு வருவோம்... தலைப்பில் உள்ளபடி, சீமானோ, அவரது தம்பிகளோ தடுப்பூசி இல்லாமல் வெறிநாயிடம் கடிவாங்கி தங்கள் வீரத்தை நிரூபிக்க முடியுமா? வெறிநாய் கடிக்கு எந்த உணவு மருந்தாகும் சீமான் அவர்களே? உங்கள் பாரம்பரியம் பண்பாடு என்ற போலி இனஉணரவுக்கு மயங்கி, தமிழர்களின் பிள்ளைகள் நோய்கள் வந்து உயிரையே, நல்ல உடல் நலத்தையோ இழந்தால் அதற்க்கு நீங்கள் பொறுபேர்ப்பீர்களா? ஒரு சமுதாயத்தையே அறிவுக்குருடராக்குவதே உங்கள் வேலையா?

சீமான் மற்றும் அவர் தமபிகளுக்கு ஒன்றை சொல்லிக்கொள்ள விரும்புகிறேன்... ஒருவன் தன்  நம்பிக்கையினால் தான் பெற்ற பிள்ளையை நரபலி கொடுப்பது சரியா? அதுபோலவே உங்கள் போலி இணைப் பெருமிதத்தால் குழந்தைகளின் உயிரோடும் உடல்நலத்தோடும் விளையாடுவதும் தவறே! உங்கள் நம்பிக்கையும் மூட நம்பிக்கையே!

தடுப்பூசிகள் தேவையே!

தடுப்பூசிகள் தேவையே! அரசு இலவசமாக வழங்கும் எம்.ஆர். தடுப்பூசி மிகவும் பாதுகாப்பானது மற்றும் பயனுள்ளது. MR (Measles  Rubella) தடுப்பூசி இரு கொடிய நோய்களில் இருந்து உங்கள் குழந்தைகளை பாதுகாக்கும். பணக்காரர்கள் மட்டுமே பெற்று வந்த MMR ஊசி போன்ற இந்த தடுப்பூசியை இன்று நம் அரசு அனைவருக்கும் இலவசமாக்கியுள்ளது. இதற்க்கு நாம் அரசுக்கும், இதை முன்னெடுத்த எல்லோருக்கும் நன்றி சொல்ல வேண்டும். ஆனால் நடப்பது என்ன?

இன்று கையில் செல்போன் மற்றும் ஜியோ தரும் இலவச இணைய இணைப்பை வைத்துக்கொண்டு ஒரு கூட்டம் தடுப்பூசிகளுக்கு எதிராக எழுதி வருகிறது. இவர்களில் யாரும் (முறையாக மருத்துவம் பயின்ற) மருத்துவர்கள் இல்லை. இவர்களில் பெரும்பாலானோர் போலி அறிவியல் துணையோடு பிழைப்பு நடத்தும் அற்ப ஜந்துக்கள். சிலர் மத/ஆன்மீக வியாபாரிகள். இவர்கள் அனைவரும் நம் நாட்டு அரசையும் அறிவியல் மற்றும் மருத்துவ சமுதாயத்தையும் கேள்விக்குள்ளாக்குகின்றனர். யாரும் கேள்விகளுக்கு அப்பாற்பட்டவர் கிடையாது. ஆனால் கேள்வி கேட்க ஒரு தகுதியும் நியாமமும் இருக்க வேண்டும். சந்தேகம் வேறு, அவதூறு வேறு. நேற்று நான் ஒரு கடைக்குச் சென்றேன். அருகில் இருக்கும் குழந்தைகள் மருத்துவமனையில் ஒரே கூட்டம். கடைக்காரரிடம் கேட்டேன். அவன் கூறிய பதில் என்னை அதிர வைத்தது. எம். ஆர் தடுப்பூசி அறிவிப்பு வந்த நாள் முதல் இங்கு கூட்டம் அலைமோதுவதாகக் கூறினார். மக்கள் அரசை விட, மருத்துவர்களை விட, அறிவியலாளர்களை விட வாட்சாப்பையும் பேஸ்புக்கையும் நம்பும் காலத்தில் நாம் வாழ்கிறோம் என்ற சிந்தனை என்னை இப்போதும் நெருடுகிறது.

அலுவலகத்தில் அருகில் இருந்த நண்பரிடம் பேசினேன். அவர் சொல்கிறார் "எல்லா வைரஸும் நிலவேம்புக்கு சாகும். எனவே தடுப்பூசி போடா வேண்டாம்" என்று. நான் கேட்டேன், "போலயோ, பெரியம்மை போன்ற நோய்களை நிலவேம்பு அல்லது இயற்க்கை மருத்துவம் மூலம் முற்றிலும் அளித்திருக்க முடியுமா?" என்று. அவர் "கண்டிப்பாக!" என்றார். எனக்குத் தூக்கிவாரிப்போட்டது! பொறியியல் படித்து, 3ஜி, 4ஜி என்று சுத்தும் மேதைகளின் பேதைமை இப்படி! முயற்சியை விடாத நான், "வெறி நாயிடம் கடிபட்டாலும் ஊசி போடா மாடீர்களா?" என்றேன். சுதாரித்த நண்பர் "உங்கள் விதண்டாவாதம் தவறு" என்று முடித்துக்கொண்டார்.

என்ன நடக்கிறது இங்கே? இதை எழுதும் நான் கிறிஸ்தவ மிஷனரி என்றோ (என் பெயரை வைத்து), ப.ஜ.க. கட்சிக்காரர் என்றோ (மத்திய அரசு திட்டத்தை ஆதரிப்பதால்), மருந்துக் கம்பெனிகளின் ஏஜென்ட் என்றோ, ஏன், இல்லுமினாட்டி என்றோகூட முத்திரை குத்தப்படலாம். இவர்களைப் பொறுத்தவரையில் உலகத்தில் நடப்பது எல்லாம் சாதி. எல்லாம் பெரிய சூழ்ச்சியின் பகுதி. கேட்டல் "தனி ஒருவன்", "பூலோகம்" என்று ஜெயம் ரவி படங்களை மேற்கோள் காட்டுவார்கள். ஜல்லிக்கட்டு விஷயத்தில்கூட தமிழர்களின் கலாச்சார உரிமை என்ற நேரடி வாதத்தைவிட ஏ1, ஏ2 புரளிவே போராட்டம் வெடிக்க உதவியது. மீத்தேன் திட்டம், கூடங்குளம் அணுஉலை, நியூட்ரினோ ஆராய்ச்சி, ஹைட்ரோகார்பன் திட்டம் என எதை எடுத்தாலும் ஒரு அறிவியல் புறம்பான நிலைப்பாட்டை நாம் எடுப்பது சரியா? தக்க பாதுகாப்பு அம்சங்களும், நியாயமான நிபந்தனைகளுடன்கூடிய ஒப்பந்தங்களும் வேண்டும் என்று கேட்டால் பரவாயில்லை. நம்மாழ்வார் சொன்னார், செந்தமிழன் சொன்னார், ஹீலர் பாஸ்கர் சொன்னார் என்று ஏதாவது ஒன்றைப் பிடித்துக்கொண்டு நாட்டின் வளர்ச்சியை முடக்குவது சரியா?

நீங்கள் செய்யாவேண்டியது ஒன்றே! துறைசார்ந்த வல்லுநர்கள் கருத்தைக் கேளுங்கள். அதுவும் ஒருவர் இருவர் கூறுவதை மட்டும் அல்ல, பெரும்பான்மை வல்லுநர்கள் என்ன சொல்கிறார்கள் என்று பாருங்கள். அதை உங்கள் அடிப்படை அறிவைக்கொண்டு அலசி ஆராய்ந்து பாருங்கள். பின் ஒரு முடிவுக்கு வாருங்கள். தடுப்பூசி என்றால் மருத்துவர், அணுஉலை என்றால் அணு விஞ்ஞானிகள் என்று எல்லாவற்றிற்கும் படித்த வல்லுநர்கள் நிறைந்த நாடு நம் நாடு. அவர்களை விட்டு விட்டு தெருவில் போகும் குடுகுடுப்பைக்காரன் அளவுக்கே அறிவு உள்ள, பயத்தையும் பொய்களையும் மட்டுமே விற்று பிழைப்பு நடத்தும் ஆட்களை நம்பினால் நாம் எப்படி வல்லரசு ஆவோம்?

பல லட்சம் குழந்தைகளுக்குப் போடும் ஊசியில் சதி செய்யும் கேவலமான அரசும் மருத்துவர்களும் உள்ள நாடா இந்தியா? இன்னும் உங்களுக்கு இந்த நாட்டின் மீதும் இங்குள்ள அறிவியல் ஆய்வாளர்கள்மீதும் நம்பிக்கை வரவில்லையா? வர வேண்டாம்... குறைந்தபட்சம் உங்கள் குழந்தை விஷயமான தடுப்பூசியை உங்கள் பேஸ்புக்/வாட்சாப் புளுகு மூட்டைகளை ஓரம் கட்டி வைத்துவிட்டு அருகில் உள்ள மருத்துவரையோ அல்லது துறை சார்ந்த நிபினரையோ கேளுங்கள். அவர்கள் தங்கள் பிள்ளைகளுக்கும், தங்களுக்கும் இந்த ஊசியை போடுகிறார்களா என்று கேளுங்கள். அப்போதாவது உங்களுக்கு புரிந்தால் சரி. எக்காரணம் கொண்டும் உங்கள் மூட நம்பிக்கை ஒரு குழந்தையின் ஆரோக்கியத்தில் விளையாட அனுமதிக்காதீர்கள்.

மீன்களில் பாதரசம்

மீன் ஒரு நல்ல உணவு. உடலுக்குத் தேவையான புரதம், இதயத்துக்கு இதமான ஒமேகா-3 (ஒமேகா-3) என்னும் நல்ல கொழுப்பு, வைட்டமின் பி  வரிசைச் சத்துக்கள் என்று மீன் உணவு உள்ளடக்கியுள்ள சத்துக்கள் ஏராளம். ஆனால் ஒன்றில் நாம் கவனமாக இருக்க வேண்டும். மீன்களில் சிலவற்றில் பாதரசம் அளவு அதிகம் இருக்கும். அவ்வகை மீன்களை கர்ப்பிணி/பாலூட்டும் பெண்களும் 15 வயதுக்குக் கீழ் உள்ள சிறுவர்களும் அரைவே தவிர்ப்பது நல்லது. மற்றவர்களும் அளவுடன் சாப்பிடுவது நல்லது. இதைப் பற்றி விரவாகப் பார்ப்போம்.

பாதரசம் - ஒரு பார்வை:

பாதரசம், இதளியம் அல்லது இதள் (mercury) ஒரு உலோகம். அறை வெப்பநிலையில் திரவமாக இருக்கக்கூடிய உலோகம். தூய பாதரசமும் அதன் பெரும்பாலான வேதிச் சேர்மங்களும் கொடிய நச்சுத்தன்மை கொண்டவை. இந்திய பாரம்பரிய மருத்துவ முறைகள் இதை மருந்தாகப் பார்த்தாலும் அறிவியல் இதை நஞ்சு என்று சந்தேகத்துக்கு இடமில்லாமல் நிறுவியுள்ளது. குறிப்பாக மீனில் உள்ள மெத்தில் மெர்குரி (methyl mercury) என்னும் சேர்மம் நம் உடலிலேயே தேங்கி இருக்கக்கூடியது. நம் அனைவரின் உடலிலும் வெகு வெகு சிறிய அளவு பாதரசம் உண்டு. ஆங்கிலத்தில் இதை trace amount  என்று கூறுவர். அதே போல நாம் உண்ணும் அனைத்து மீன்களிலும் பாதரசம் உண்டு. ஆனால் பெரும்பாலான மீன்களில் அது பாதுகாப்பான அளவிலே இருக்கும். சில மீன்களில் அது தீங்கு விளைவிக்கக்கூடிய அளவில் இருக்கும். இதனால் மூளை மற்றும் நரம்பு மண்டலம் பாதிக்கப் படலாம். ஆகவே மூளை மற்றும் நரம்பு மண்டலம் வளரும் நிலையில் இருக்கும் சிறுவர்கள் மற்றும் கருவில் இருக்கும் குழந்தைகள் பாதரசத்தால் அதிகம் பாதிப்படைய வாய்ப்பு உள்ளது.

எவை எல்லாம் ஆபத்தானவை?

பொதுவாக நன்னீர் மீன்களைவிட கடல் மீன்களே பாதரசம் அதிகம் உள்ளவையாகக் காணப்படுகின்றன. குறிப்பாக கடலிலும் தாவர பட்சி மீன்கள் பெரும்பாலும் மிகக் குறைந்த பாதரச அளவு கொண்டவையாக உள்ளன. அதேபோல பெரிய மீன்களில் சிறிய மீன்களைக் காட்டிலும் பாதரசம் அளவு அதிகமாக இருக்கும். அதற்கான காரணம் பின்வருமாறு.

நன்றி: விக்கிமீடியா

1. எல்லா மீன்களிலும் பாதரசம் உண்டு. அது மெத்தில் மெர்குரி வடிவில் இருக்கும்
2. ஒரு மீன் மற்றொரு மீனைத் உண்ணும்போது உண்ணப்படும் மீனில் உள்ள மெத்தில் மெர்குரி உண்ணும் மீனின் உடலில் சேருகிறது.
3. ஏற்கனவே சொன்னதுபோல ஒருமுறை உடலில் சேரும் மெத்தில் மெர்குரி உடலிலேயே தங்கிவிடுகிறது.
4. அதிகமான மீன்களை உண்ண உண்ண, நாட்கள் செல்லச் செல்ல, அளவு வளர வளர அதிக அளவு மெத்தில் மெர்குரி சேர்ந்து விடுகிறது.

நெய்மீன்(கடல் மீன், நெய் கெளுத்தி மீன் நன்னீர் மீன்), வஞ்சரம், சுறா, ஊளி, சீலா, முரல் போன்ற மீன்களில் அதிக பாதரசம் இருப்பது கண்டறியப்பட்டுள்ளது. இவற்றை கர்ப்பிணிகள், பால் கொடுக்கும் பெண்கள், 15 வயதுக்கு உட்பட்ட சிறுவர்கள் உண்ணக்கூடாது. மற்றவர்கள் அளவாகவும் இடைவெளி விட்டு உண்ண வேண்டும் (மாதம் 2-4 முறை, 100-200 கிராம், அளவுகள் மீனின் வகை மற்றும் பருமன் பொறுத்து மாறலாம்!).

இறால், நண்டு, விலை, பாறை, மத்தி, வாவல் போன்ற தாவரம் உண்ணும்/சிறிய மீன்கள் மிகவும் குறைந்த அளவே பாதரசம் கொண்டவை. இவை பாதுகாப்பானவை.

கட்லா, மிருகால், ரோகு, சிலேபி, கெளுத்தி, அயிரை போன்ற நன்னீர் மீன்கள் அனைத்தும் பாதுகாப்பானவை.

**பால் கொடுக்கும் தாய்க்கு சுறா மீன் கொடுப்பது மரபுவழி வழக்கமாக இருக்கலாம். ஆனால் அறிவியலின் பார்வையில் அது ஆபத்தானது. ஆகவே உங்கள் வீட்டில் அதுபோல யாரேனும் சொன்னால் அவர்களுக்கு நீங்கள் விளக்கிக் கூறுங்கள். மரபை விட மனிதனின் நலமே முக்கியம்!

முடிவாக

மீன்கள் நல்ல உணவாக இருந்தாலும், அவை சில சமயங்களில் உடலுக்குத் தீமை செய்யும் நச்சுப் பொருட்களையும் கொண்டிருக்கலாம்! ஆனால் அறிவியலின் துணையோடு ஆராய்ந்து சரியான மீன்களைத் தேர்ந்தெடுத்து உண்டால் நலமும் வளமும் நமதே!