"துளிர்"க்கட்டும் அறிவியல் ஆர்வம்

உங்கள் வீட்டில் உள்ள குழந்தைகள் முதல் வயது முதிர்ந்தோர்வரை அனைவரும் அறிவியல் ஆர்வம் பெற்றிருப்பது இன்றைய சூழலில் மிக முக்கியமான ஒன்று. ஆனால் சமூக வலைத்தளங்களாகட்டும், தொலைக்காட்சியாகட்டும், அச்சு ஊடகங்களாகட்டும், எங்கு திரும்பினாலும் போலி அறிவியலின் தாக்குதல் எட்டுத்திக்கும் இருந்து சீறிப்பாய்கிறது. திரைப்படங்களைச் சொல்லவே வேண்டாம். "மனிதனின் சராசரி ஆயுள்காலம் 300 வருடம்" என்றெல்லாம் வசனம் பேசி கைதட்டலும் காசும் சம்பாதித்துவிட்டு அவர்கள் தப்பித்துவிடுகிறார்கள், பார்க்கும் நம் மக்களோ அறிவைத்தொலைத்துவிட்டு மூடமயக்கத்தில் தடுமாறுகிறார்கள். அறிவியல் பற்றிய பத்திரிக்கைகள் வெகு சிலவே கிடைக்கின்றன. அவற்றில் பெரும்பாலானவை விலை அதிகமுள்ளவையாகவும், ஆங்கிலப் பாதிப்புகளாகவும் உள்ளன. தமிழில் ஒரு நல்ல அறிவியல் பத்திரிகை இருந்தால்? அதுவும் அது குறைந்தவிலையில் எல்லோரும் வாங்கிப் பயன்பெறும் வகையில் இருந்தால்? எவ்வளவு நன்றாக இருக்கும்?

அப்படி ஒரு மாத இதழ் இருக்கிறது! தமிழ்நாடு மற்றும் புதுவை அறிவியல் இயக்கங்கள் இணைந்து வெளியிடும் இந்த மாத இதழ், "துளிர்" என்ற பெயரில் வெளிவருகிறது. இதழ் ஒன்றுக்கு 10 ரூபாய் என்கிற நம்பமுடியாத விலையில் கிடைக்கிறது. வெறும் 100 ரூபாய் சந்தா செலுத்தினால் ஒரு ஆண்டு முழுவதும் உங்கள் வீடு தேடியே வரும்! சற்று சிந்தித்துப்பாருங்கள். ஒரு திரைப்படம் பார்க்க இதைவிட அதிகம் செலவாகும். ஒரு சின்ன பொம்மை இதைவிட அதிக விலை இருக்கும். உங்கள் வீட்டுக் குழந்தைகளுக்கோ, அல்லது உங்கள் உறவினர்/நண்பர்கள் வீட்டுக் குழந்தைகளுக்கோ ஒருவருட சந்தாவைக் கட்டி அவர்கள் வீடுதேடி இவ்விதழ் மாதம்தோறும் வரும்வகையில் ஒரு அன்பளிப்பைத் தரலாம். நீங்களும் இவ்விதழை தொடர்ந்து வாசிப்பதன் மூலம் உங்கள் அறிவியல் அறிவை கூர்மையாக வைத்துக்கொள்ளலாம்.

பள்ளியில் படிக்கும் அறிவியல் கருத்துக்கள் சரியாகப் புரியாமலோ அல்லது அறிவியல் ஆர்வத்தின் மிகுதியிலோ குழந்தைகள் எழுப்பும் கேள்விகள் ஏராளம். ஆனால் பொறியியலோ மருத்துவமோ பயின்ற பெற்றோர்கள்கூட அக்கேள்விகளுக்கு பதிலளிக்கத் தடுமாறும் நிலையில் உள்ளனர். இதுவே அவர்களிடம் ஏதாவது மூடநம்பிக்கைகள் குறித்துக் கேட்டுப் பாருங்கள்? பக்கம் பக்கமாக விளக்குவார்கள். ஆனால், உங்கள் வீட்டில் துளிர் இதழ் இருந்தால், நீங்களும் உங்கள் அறிவியல் அறிவை வளர்த்துக்கொண்டு இளைய தலைமுறைக்கும் பயன்படும் வகையில் அதைப் பயன்படுத்தலாம். வீட்டில் உள்ள தாத்தா பாட்டிகள்கூட தங்கள் ஓய்வு நேரத்தில் "துளிர்" இதழை வாசித்து, அதில் உள்ள தகவல்களை எளிய கதைகளாக குழந்தைகளுக்குச் சொல்லலாம்.

துளிர் அறிவியல் மாத இதழை உங்கள் வீட்டிற்கே வரவழைக்க, கீழ்காணும் வழிகளில் தொடர்புகொள்ளலாம்.

முகவரி:

துளிர் நிர்வாக அலுவலகம்,
245, அவ்வை சண்முகம் சாலை,
கோபாலபுரம்,
சென்னை 600 086

தொலைப்பேசி எண்: 044 28113630

மின்னஞ்சல் முகவரி: thulirmagazine@gmail.com

சந்தா விவரங்கள்:
ஒரு இதழ்: ரூ. 10/-
ஆண்டுச் சந்தா: ரூ. 100/-
ஆண்டுச் சந்தா (வெளிநாடுகளுக்கு): $ 20
ஆயுள்ச் சந்தா: ரூ. 1000/-

கொஞ்சம் படிங்க பாஸ்! - பகுதி 8

நூலின் தலைப்பு: தி கிரேட்டெஸ்ட் ஷோ ஆன் எர்த் (The Greatest Show on Earth)
ஆசிரியர்: ரிச்சர்டு டாவ்கின்ஸ்
பக்கங்கள்: ~500
வெளியீடு: டிரான்ஸ்வேர்ல்டு வெளியீடு
மொழி: ஆங்கிலம்
விலை: ~ ரூ. 400/-
வயது: 15+
பொருள்: அறிவியல், உயிரியல், பரிணாமம்

"இவ்வுலக மேடையில் நாம் அனைவரும் நடிகர்கள்!" என்ற ஷேக்ஸ்பியர் கூற்றுப்படி, உலகிலேயே பல கோடி ஆண்டுகளாகத் தொடந்து நடந்துவரும் நாடகம் எது? அனைத்து உயிர்களாலும் கூட்டாக நடத்தப் படும் பரிணாமமே அது! அத்தகைய பரிணாமத்தை பாடத்தில் படிக்கும்போது நாம் புரிந்துகொள்வது கொஞ்சமே. அந்தப் புரிதலும் பெரும்பாலான நேரங்களில் தவறாகவே உள்ளது. ஆனால் மத வியாபாரமும் போலி அறிவியலும் மலிந்துள்ள இன்றைய சூழலில் பரிணாமக் கோட்பாடைச் சரியாகப் புரிந்துகொள்வது இன்றியமையாதது. இந்நூல் அந்த முக்கியமான பணியைச் செய்கிறது.

சுமார் 500 பக்கங்கள் நீளும் இந்நூல் சற்றுப் பெரியதுதான். மேலும் குறைந்தது 15 வயதாவது ஆனா அறிவியல் ஆர்வமுள்ளவர்கள் படிக்கும் வகையில் எழுதப்பட்டுள்ளது. அறிவியல் ஆர்வம் மற்றவர்களும், சிறுவயதினரும், பிறர் உதவியுடன் படிக்கலாம் அல்லது இந்நூலைப் படித்தவர்கள் அவர்களுக்கு விளக்கிச் சொல்லலாம். எளிய சோதனை விளக்கங்கள், எடுத்துக்காட்டுகள் மற்றும் விரித்தல் மூலம் டாவ்கின்ஸ் அவர்கள் பரிணாமக் கோட்ப்பாட்டை முடிந்தவரை எளிமையாக நம் முன் வைக்கிறார். மேலும் இதனால் பரிணாமம் குறித்த சரியான புரிதல் நமக்கு கிடைக்கிறது (இது தான் மிக முக்கியமான சிறப்பம்சம்!).

English Summary:  

Book Title: The Greatest Show on Earth
Author: Richard Dawkins
Pages: ~500
Publisher: Transworld Publishers
Language: English
Price: ~ Rs. 400/-
Age Group: 15+ 
Category: Science, Biology, Evolution

கிஷ் ஓட்டம்

நன்றி: விக்கிமீடியா

ஒரு நேர்மையான விவாதம் கருத்துக்களை பரிமாறிக்கொள்ளவும் உண்மைகள் வெளிவரவும் உதவும். ஆனால் இன்று தொலைக்காட்சிகளிலும் சரி, சமூக வலைத்தளங்களிலும் சரி விவாதங்கள், சொற்கள் நிரம்பிய குப்பைத்தொட்டிகள் போலவே உள்ளன. "கிஷ் காலோப்" (Gish Gallop) என்று ஆங்கிலத்தில் அழைக்கப்படும் "கிஷ் ஓட்டம்" என்ற ஒரு தவறான தர்க்க முறை (logical fallacy) குறித்துப் இங்கு பார்ப்போம். டுவேன் டால்பெர்ட் கிஷ் (Duane Tolbert Gish) ஒரு உயிர்வேதி அறிஞர் (Biochemist) மற்றும் இளம் புவி படைப்புவாதி (Young Earth Creationist). இவர் பொதுவாகத் தான் பங்கெடுக்கும் உரையாடல்கள் மற்றும் சொற்போர்களில்  கையாண்ட தவறான விவாத முறையே இன்று அவர் பெயரில் வளங்கப்பட்டு வருகிறது.

கிஷ் ஓட்டம் என்றால் என்ன?

எவ்வளவுதான் படித்தவராக இருந்தாலும், எவ்வளவு நினைவுத்திறன் கொண்டவராயினும், எல்லோர் அறிவுக்கும் ஒரு எல்லை உண்டு. திடீர் என்று ஒரு மேடையில் பல்வேறு தொடர்பற்ற, பொருளற்ற வாதங்களை அடுக்கிக்கொண்டே போனால், முதலில் எதை மறுப்பது, சொல்லியதில் எது உண்மை எது பொய், எப்படி பல்வேறு வாதங்களை ஒரு பதில்கொண்டு மறுப்பது போன்ற பல சிக்கல்கள் உருவாகும். இதனால் அவர்கள் தடுமாறுவதோ, அல்லது முழுமையான விடை சொல்லாமல் போவதோ இயல்பே! இத்தகைய வகையில் விவாதத்தில் வென்றது போன்ற ஒரு மாயத் தோற்றத்தை ஏற்படுத்துவதுவே "கிஷ் ஓட்டம்" ஆகும்.

எடுத்துக்காட்டு

கிறிஸ்துமஸ் தாத்தா உண்டா இல்லையா என்று விவாதம் நடப்பதாக வைத்துக்கொள்வோம். வரலாறு மற்றும் அறிவியல் அறிஞர்களும், கிறித்துமஸ் தாத்தா உண்டு என்று நம்பும் சிறுவனும் பங்கெடுப்பதாகக் கொள்வோம். திடீர் என்று அந்தச் சிறுவன், "கிறித்துமஸ் தாத்தா இருப்பது, நாசா ஆய்வாளர்கள் கண்டறிந்துள்ளனர், ஜான் வில்லியம்சன் எழுதிய 'வடதுருவ விசித்திரங்கள்' புத்தகத்தில் அவர் புகைப்படம் உள்ளது. சென்ற ஆண்டுகூட என் வீட்டிற்கு வந்து அவர் பரிசு கொடுத்தார். உலகில் என் போல 30 கோடி சிறுவர்கள் அவரை நம்புகின்றனர். நாங்கள் எல்லோரும் முட்டாள்களா, மயில் இறகு குட்டி போடும் பொது கிறிஸ்துமஸ் தாத்தா இருக்க முடியாத? அவர் தாத்தா என்பதால்தானே அவருக்கு தாடி இருக்கிறது? அதுவே அது பாட்டியாக இருந்தால் எப்படி தாடி இருக்கும்? தாடி வெள்ளையாய் இருப்பதே அவர் வயதான தாத்தா என்பதற்கு சான்று. இதுகூடப் புரியாமல் நீங்கள் எப்படி அறிஞர்கள்? 1932 வரை கிறிஸ்துமஸ் தாத்தா பச்சை சட்டைதான் போடுவார். பிறகு அது என் சிவப்பாக மாறியது என்று பெனெடிக் கிங்ஸ்லி என்ற வரலாற்று ஆய்வாளர் எழுதியுள்ளார்" என்று அடுக்கிக்கொண்டேய போகிறான்.

இப்போது நாம் எங்கிருந்து பதில் சொல்லத் தொடங்குவது? முதலில் அந்தச் சிறுவன் கூறியது போல ஆய்வாளர்களும், ஆய்வுகளும் உண்மையில் உள்ளனவா? அப்படி இருந்தாலும் அவை நம்பகத்தன்மை உள்ளனவா? இது உடனுக்குடன் அறியக்கூடியவை அன்று. இதில் இன்னொரு சிக்கலும் உள்ளது. அந்த ஆய்வாளர்களும், ஆய்வுகளும் உண்மையாக உள்ளவையே என்று நிறுவும் சுமை (burden of proof) யாருக்கு உள்ளது? உண்மையில் அது அந்தச் சிறுவனின் பொறுப்பு. ஆனால் இப்போது அப்படிப்பட்ட ஆய்வாளர்களும், ஆய்வுகளும் இல்லை என்று எதிர் அணி நிறுவ வேண்டும். மேலும் விவாதத்துக்குத் தொடர்பில்லாத கிறிஸ்துமஸ் தாத்தா ஆணா பெண்ணா, வயதானவரா இளைஞரா, அவரை எத்தனை சிறுவர்கள் நம்புகிறார்கள் போன்ற வாதங்களை முன்வைப்பதன் மூலம் விவாதம் திசைதிருப்பப்படுகிறது. இவை எல்லாவற்றிற்கும் ஒரே விடையையோ அல்லது ஒரு சில சிறு விடைகளையோ சொல்லி எதிர்கொள்ள முடியாது. ஆனால, அந்த மேடையில் பெரிய விளக்கங்களோ, ஆய்வுகளோ, நூல் தேடல்களோ மேற்கொள்ள நேரமும் வாய்ப்பும் கிடையாது. ஆகவே எதிர் அணி பாடு திண்டாட்டம்தான்.

தாக்கம்

இது போன்ற "கிஷ் ஓட்டங்களை" சமயப் பரப்புரை மற்றும் ஆன்மீக வியபாரம் செய்யும் ஆட்களிடம் அதிகம் பார்க்கலாம். ஒரு மேடையிலோ அல்லது தொலைக்காட்சியிலோ இவ்வாறு பேசுவதன் மூலம், தன் தரப்பு வாதங்கள் சரி போலவும், எதிர்தரப்பு அறியாமையில் மூழ்கியுள்ளது போலவும் காட்டிக்கொண்டு விவாதத்தில் வென்று விட்டது போல பெருமிதம் அடைகிறார்கள் இவ்ரகள். போலி அறிவியல் துணைகொண்டு பிழைப்பு நடத்தும் ஒட்டுன்னிகளும் இத்தகைய பேச்சுக்கள் மூலம் மக்களை முட்டாள்களாக்குகின்றனர். அரசியல்வாதிகளும்கூட இதற்க்கு விதிவிலக்கல்ல. அறிவு நாணயம் (intellectual honesty) அற்ற இதுபோன்ற நடவடிக்கைகளால் உண்மைகள் மறைக்கப்படுவதோடு பொய்கள் மக்களின் மனதில் நிலைநிறுத்தப்படுகின்றன.

என்ன செய்யலாம்?

இது எவ்வளவு பெரிய சமூகக்கேடு என்று கொஞ்சம் சிந்தித்துப் பாருங்கள். இனி விவாதங்களை கவனிக்கும்போது இவ்வாறான தவறான முறைகள் கையாளப்படுகின்றனவா என்று உற்றுநோக்குங்கள். இத்தகைய அறிவு நாணயமற்ற செயல்களைச் செய்பவர்கள் பெரும்பாலும் பொய்யர்களாவே இருப்பர். அத்தகையவர்களை அடையாளம்கண்டு அவர்களைப் பொருட்படுத்தாமல் இருப்பது நலம். எந்த ஒரு மேடை விவாதமோ, தொலைகாட்சி விவாதமோ, வலைத்தள கருத்துப்பதிவு (comment) சண்டைகளோ ஒரு அறிவுப்பூர்வமான முடிவுக்கு வர உதவாது. ஏனென்றால், அறிவு (அறிவியல்/அரசியல்/சமூகம்) என்பது பல ஆண்டுகள் கடின உழைப்பு, வாசிப்பு, கற்றல், புரிதல், ஆய்வுகள் என்று நெடிய வழிப் பயணம். ஒரு குறுகிய கால விவாதம்  அதைத் தீர்மானிக்க முடியாது. அதற்காக விவாதங்கள் வேண்டாம் என்று நான் சொல்லவரவில்லை. அவற்றை வாழ்வியல் உண்மைகளாக நம்பவேண்டாம் என்று சொல்கிறேன்.

"அறிவியலில் தேரோடும் தெருக்கள் கிடையாது. அதன் செங்குத்தான வழிகளில் களைப்போடு ஏறிச் செல்வதற்குத் தயங்காதவர்களுக்கு மட்டுமே அதன் ஒளிமயமான உச்சிகளை எட்டுகின்ற வாய்ப்பு கிடைக்கும்." -காரல் மார்க்ஸ்

தமிழை வளர்க்க என்ன செய்யலாம்? - 5 எளிய செயல்கள்

1. தமிழில் பேசுங்கள்/எழுதுங்கள்!

ஒரு மொழியின் உயிர்ப்பே அதை எவ்வளவு பேர் எவ்வளவு அதிகமாகப் பேசுகிறார்கள், எழுதுகிறாரகள் மற்றும் இதர இடங்களில் பயன்படுத்துகிறார்கள் என்பதைப்பொறுத்தது. நீங்கள் வீட்டிலும், பொதுவெளியிலும் தமிழிலேயே பேசுங்கள். நாளுக்கு நாள் உங்கள் பேச்சில் உள்ள பிறமொழிச் சொற்களைக் குறைக்க முயலுங்கள். "உதாரணமாக" --> "எடுத்துக்காட்டாக", "சேஞ்ச் இருக்கா?" --> "சில்லறை இருக்கா?", "மொசாம்பி ஜூஸ்" --> "சாத்துக்குடிச் சாறு". இப்படி கொஞ்சம் கொஞ்சமாகத் தமிழை பழக்கப்படுத்துங்கள். சில ஆண்டுகளுக்கு முன், கணினி, இணையம் போன்ற சொற்கள் சிலர் மட்டுமே அறிந்ததாக இருந்தன. இன்றோ பெரும்பான்மை தமிழர்களுக்கு இச்சொற்கள் பரிட்சயமானவை நன்கு தெரிந்தவை.

வங்கி சென்றால் தமிழில் படிவங்களைக் கேளுங்கள். வங்கி, அலைப்பேசி நிறுவனங்கள், விளம்பர நிறுவனங்கள் போன்றவற்றில் இருந்து வரும் தொலைப்பேசி அழைப்புகளுக்குத் தமிழிலேயே பதிலளியுங்கள். அவர்கள் வேறு மொழி பேசினால், தமிழ் தெரிந்த ஒருவரைப் பேசச் சொல்லுமாறு கூறும் உரிமை நமக்குண்டு! இப்படி அதிக எண்ணிக்கையில் தமிழில் சேவைகள் பெறப்படும்போது, அவற்றின் அவசியம் அந்நிறுவனங்களுக்கும் புரியும். தமிழ் நூல்கள், செய்தித் தாள்கள், வலைத்தளங்கள் போன்றவற்றை அதிகம் படியுங்கள். தமிழுக்குச் சந்தை மதிப்பு அதிகரித்தால், தானாகப் பல நிறுவனங்கள் தமிழில் தங்கள் நூல்கள், தொலைக்காட்சி நிகழ்ச்சிகள் மற்றும் வலைத்தளங்களை மொழிபெயர்த்து வெளியிடுவர்.

2. தமிழ்வழிக் கல்வி 

இது இன்றைய சூழலில் சற்று சிக்கலான செயலே! தமிழில் அறிவியல் மற்றும் தொழில்நுட்பம் சார்ந்த முன்னேற்றங்கள் இன்னும் சற்று பின்தங்கி உள்ளது மறுக்கமுடியாதது. ஆகவே ஆங்கிலம் நமக்கு இந்த இடைவெளியை நிரப்ப அவசியமாகிறது. அதனால் நாம் கல்வியில் ஆங்கிலத்தை சேர்த்துக்கொள்வது தவறில்லை. தமிழ் என்று எல்லாத்துறைகளிலும் தன்னிறைவு அடைகிறதோ, அன்று ஆங்கிலத்தை நாம் அடியோடு நிறுத்திவிடலாம். எப்படி நீச்சல் கற்கச் சுரைக்குடுக்கை உதவுகிறதோ, அதுபோல! அதுவரை ஆங்கிலத்தை அளவோடு கற்போம். ஆங்கிலத்தை இப்படித் தேவைக்குக் கற்றாலும், அதை ஒரு பெருமையாக எண்ணாமல் இருப்பது அவசியம்.

குழந்தைகளுக்கு நாம் ஏன் ஆங்கிலம் கற்கிறோம் என்று சொல்லுங்கள். ஆங்கிலம், அறிவின் அடையாளமோ, நாகரீகத்தின் குறியீடோ இல்லை. மாறாக அது நாம் இழந்த அறிவியல் மற்றும் சமூக முன்னேற்றங்களை அடைய உதவும் பாலம் மட்டுமே என்று விளங்க வையுங்கள். இவ்வாறு நாம் தமிழில் மட்டும் எல்லாப் பாடங்களையும் கற்கும் நாளுக்கு அவர்களை ஆயத்தப் படுத்துங்கள். இன்னும் சில தலைமுறைகளில் அது நடக்கும். ஆங்கிலேயர் நம்மை சில காலம் ஆண்டதாலும், ஆங்கிலம் பல்வேறு துறைகளில் வளர்ச்சி பெற்ற மொழி என்பதாலும் மட்டுமே ஆங்கிலம் தேவையாகிறது. இந்தி, ப்ரெஞ்சு, ஜெர்மன், சமஸ்க்ருதம் போன்ற மொழிகள் மேற்கூறிய வகையில் நமக்கு உதவாதவைகள்.

3. சமூக வலைத்தளங்களில் தமிழ்

இன்று சமூக வலைத்தங்கள் அனைவரையும் தங்களின் வலையில் சிக்கவைத்துள்ளன. இதையே ஒரு வாய்ப்பாக நாம் மாற்றிக்கொள்ளலாம். நீங்கள் கைப்பேசி வாங்கும்போதே அதில் தமிழ் உள்ளீடு வசதி உள்ளதா என்று பார்த்து வாங்குங்கள். அல்லது செயலிகள் மூலம் உங்கள் கைப்பேசியில் தமிழ் உள்ளீடு செய்ய முடியுமா என்று பாருங்கள். கூகிள் போன்ற தேடுபொறிகளிலும், முகநூல், ட்விட்டர் போன்ற தளங்களிலும் தமிழிலேயே உள்ளீடு செய்யுங்கள். வலைப்பூக்கள், யூட்யூப் போன்ற காணொளித் தளங்கள், மற்றும் இதர வலைத்தளங்களிலும் கருத்துக்களைப் பகிரும்போது தமிழில் பகிருங்கள்.

தமிழ் உள்ளீடு வசதி உள்ளதா என்று பாருங்கள்

இதன் மூலம் தமிழின் இணைய ஊடுருவல் அதிகரித்து பன்னாட்டு நிறுவனங்களும் சந்தையைப் பிடிக்க தமிழ் மொழியில் சேவைகளை மேம்படுத்த முற்பட வாய்ப்புள்ளது. மேலும் கைய்ப்பேசி நிறுவனங்களும் தமிழ் மொழி உள்ளீடு உள்ள கருவிகளை அதிகம் தயாரிக்க இது ஒரு உந்துதலாக இருக்கும். கணினியில் தமிழ் தட்டச்சு செய்வது சற்று கடினமே. ஆனால், கைப்பேசிகள் இன்று இதை எளிதாக்கியுள்ளன. இதை நாம் முழுமையாகப் பயன்படுத்தி இணையத்தில் தமிழை அரியணை ஏற்றுவோம்!

4. மொழிபெயருங்கள்

விக்கிபீடியா, ப்ராஜெக்ட் குட்டென்பெர்க் போன்ற கட்டற்ற கலைக்களஞ்சியங்கள் மற்றும் மின்-நூலகங்களைத் தமிழில் மொழிபெயர்க்க உதவுங்கள். மேலும் கட்டற்ற மென்பொருள்கள் மற்றும் அவற்றின் உதவிக் கோப்புகளைத் தமிழில் மொழிபெயர்க்க உதவுங்கள். இதன் மூலம் தமிழ் மட்டுமே தெரிந்தவர்களும் கணினி மற்றும் இணையம் போன்ற புதிய தொழில்நுட்பங்களைப் பயன்படுத்த நீங்கள் உதவலாம்.

கல்லூரி மாணவர்களுக்கு விடுமுறைக் காலச் செயல்பாடாக இதுபோன்ற மொழிபெயப்புப் பணிகளை கல்லூரிகள் வழங்கலாம். மருத்துவ மாணவர்கள் ஒவ்வொருவரும் ஆண்டு விடுமுறையில் விக்கிப்பீடியாவில் உள்ள மருத்துவம் சார்ந்த கட்டுரைகளில் ஒன்றையோ இரண்டையோ மொழிபெயர்த்தால் சில ஆண்டுகளில், எந்த அளவுக்கு நாம் மருத்துவ அறிவைத் தமிழுக்கு இறக்குமதி செய்திருப்போம் என்று எண்ணிப்பாருங்கள். இப்படியே  வரலாறு, தொல்லியல், உயிரியல், வேதியல், கணிதம், பொறியியல் என்று பலவேறு துறை மாணவர்களும் ஆளுக்கு ஒன்றாகத் தங்கள் தங்கள் துறை சார்ந்த கட்டுரைகளை மொழிபெயர்த்தால் அதன் தாக்கம் என்னவாக இருக்கும்? சிந்தியுங்கள்!

5. புதிய கலைச்சொற்களை கற்றல்/உருவாக்குதல் 

எல்லாவற்றிற்கும் காரணப்பெயர்களா?
(நகைப்புக்காக மாற்றப்பட்ட படம்!)

இது இன்றியமையாத ஒன்று. ஒரு உயிருள்ள மொழி, வளர்ந்துகொண்டே இருக்கும். அகவே, தமிழ் மொழி வளர்வதற்கு அதற்க்குப் புதிய சொற்கள் தேவை. கடந்த 100 ஆண்டுகளில் ஏற்பட்ட அறிவியல் வளர்ச்சிகள் ஏராளம். அவற்றைக் குறிக்கத் தமிழில் சொற்கள் உருவாக வேண்டும். எல்லாவற்றையும் காரணப்பெயர்களாக மட்டும் வைப்பது சற்றே கடினமான ஒன்று. மிக நீண்ட மற்றும் நகைப்புக்குரிய வகையில் காரணப்பெயர்களை வைப்பதைவிட, சற்று சிறிய, மனதில் நிற்கக்கூடிய எளிய சொற்களை உருவாக்குவதும் இன்றைய தேவை! இச்சொற்களை உருவாக்குவது மொழியியல் வல்லுனர்களின் வேலை! இவ்வாறு உருவான சொற்களை பயன்பாட்டிற்குக் கொண்டுவருவது, அனைவரது கடமை! ஆகவே உங்கள் ஆர்வத்திற்கேற்ப இவ்வகையிலும் நீங்கள் உதவலாம்!

கொஞ்சம் படிங்க பாஸ்! - பகுதி 7

நூலின் தலைப்பு: தி பெஸ்ட் ஆஃப் தாகூர் (The Best of Tagore)
ஆசிரியர்: ரபீந்த்ரநாத் தாகூர்
ஆங்கில மொழிபெயர்ப்பு: ஜர்னா பாசு
பக்கங்கள்: 88
வெளியீடு: ஸ்கொலாஸ்டிக் இந்தியா
மொழி: ஆங்கிலம்
விலை: ~ ரூ. 80/-
வயது: 10+
பொருள்: சிறுகதைகளின் தொகுப்பு

இந்தியா மற்றும் வங்கதேச நாடுகளின் தேசிய கீதத்தை எழுதியவர், இலக்கியத்துக்கான நோபல் பரிசைப் பெற்ற முதல் ஐரோப்பியரல்லாதவர், இந்தியாவின் முதல் நோபல் பரிசு பெற்றவர் என்று பல்வேறு சிறப்புகளைக் கொண்ட ஒரு மேதை உங்கள் குழந்தைக்கோ ஏன் உங்களுக்கோ கதை சொன்னால் எப்படி இருக்கும்? அந்த அனுபவத்தை பெற இந்த நூல் உதவும். இது தாகூர் என்ற கடலின் ஓரத்தில் நம் போன்ற எளியவர்களும் விளையாடக் கிடைத்த கடற்கரையே!

எளிய ஆங்கிலத்தில், குறைந்த விலையில் கிடைக்கும் இந்த நூலில் பத்துக்கும் மேற்பட்ட கதைகள் உள்ளன. சிறுவர்களுக்கு ஏற்றார் போல ஓவியங்களும் உள்ளன. சிறுவர்களும் புரிந்துகொள்ளும்படியான எளிய உணர்வுகளின் வெளிப்பாடு, நல்லொழுக்கங்கள் மற்றும் தாகூரின் எழுத்தோட்டம் என்று மேலும் பல சிறப்புகள் இந்நூலுக்குண்டு.

English Summary:  

Book Title: The Best of Tagore
Author: Rabindranath Tagore
English Translation: Jharna Basu
Pages: 88
Publisher: Scholastic India
Language: English
Price: ~ Rs. 80/-
Age Group: 10+ 
Category: Short stories collection

கொஞ்சம் படிங்க பாஸ்! - பகுதி 6

நூலின் தலைப்பு: அனைத்தையும் குறித்த சுருக்கமான வரலாறு
ஆசிரியர்: பில் பிரைசன் (தமிழில் மொழிபெயர்த்தவர்: ப்ரவாஹன்)
பக்கங்கள்: தமிழில் 640 / ஆங்கிலத்தில் 560
வெளியீடு: பாரதி புத்தகாலயம் / பிராட்வே புக்ஸ்
மொழி: தமிழ் / ஆங்கிலம்
விலை: ~ ரூ. 450/-
வயது: 16+
பொருள்: அறிவியல், வரலாறு

இந்தப் புத்தகம் முழுமையானதோ, துல்லியமானதோ கிடையாது. அறிவியல் குறித்த ஒரு மசாலா வரலாறு. பொதுவாக இதுபோன்ற புத்தகங்களை நான் விரும்புவதில்லை. ஆனால் இந்தப் புத்தகம் ஒரு விதிவிலக்கு. காரணம், பல்வேறு காலங்களில், பல்வேறு அறிவியல் துறைகளில் நடந்த நிகழ்வுகளை ஒரே புத்தகமாக படிக்க முடிவதே! 500 பக்கங்கள் மேல் இருந்தாலும் வாசிக்க வாசிக்க பக்கங்கள் புரள்வது தெரியாத வண்ணம் பில் பிரைசன் எழுதியுள்ளார்.

நூலின் பெரும்பகுதி வளவளவென்று கதைபோல உள்ளது ஒரு குறையே. ஆனால் அது அறிவியல் நாட்டம் இல்லாதவர்களும் வாசிக்க உதவும்வண்ணம் இருப்பதால் பெரிய குறையாகத் தெரியவில்லை. நான் தமிழ் மற்றும் ஆங்கிலப் பாதிப்புகளைப் படித்துள்ளேன். ஆங்கிலப் பதிப்பு கருத்திலும் நடையிலும் சிறப்பாக உள்ளது. ஆங்கிலத்தில் வாசிக்கவே முடியாதவர்கள் மட்டும் தமிழ் மொழிபெயர்ப்பை நாடலாம்.

English Summary:  

Book Title: A Short History of Nearly Everything
Author: Bill Bryson (Tamil Translation by: Pravaahan)
Pages: 560 (in English) / 640 (in Tamil)
Publisher: Broadway Books / Bharathi Puththagalayam
Language: English / Tamil
Price: ~ Rs. 450/-
Age Group: 16+ 
Category: Science, History

கொஞ்சம் படிங்க பாஸ்! - பகுதி 5

நூலின் தலைப்பு: கிரகணங்களின் நிழல் விளையாட்டு
ஆசிரியர்: த.வி. வெங்கடேஸ்வரன்
பக்கங்கள்: 64
வெளியீடு: பாரதி புத்தகாலயம்
மொழி: தமிழ்
விலை: ~ ரூ. 40/-
வயது: 12+
பொருள்: அறிவியல், வானியல், வரலாறு

கிரகணங்கள் எப்படித் தோன்றுகின்றன, அவற்றின் வகைகள், மற்றும் தன்மைகளைத் தொகுத்து வழங்குகிறது இந்தச் சிறிய புத்தகம். மேலும் கிரகணங்களைக் குறித்த மூட நம்பிக்கைகளை நீக்கவும் இந்நூல் உதவும். நூலின் இறுதியில் சற்றும் முன் வந்த மற்றும் வரவிருக்கும் கிரகணங்கள் அட்டவணையும் தரப்பட்டுள்ளது. கிரகண ஆராய்ச்சி குறித்த வரலாறும் இந்நூலில் இடம்பெற்றுள்ளது.

வழக்கம் போல் ஆசிரியர் த. வி. வெங்கடேஸ்வரன் அவர்கள் தன்னுடைய ரத்தினச்சுருக்க தொனியில் தகவல்களைத் தொகுத்து பல விளக்கப் படங்கள் துணையோடு இந்நூலை வழங்கியுள்ளார். சில பகுதிகளில் வாக்கிய மற்றும் எழுத்துப்பிழைகள் சரிபார்க்கப்பட்டிருந்தால் இன்னும் சிறப்பாக இருந்திருக்கும். தமிழில் இதுபோன்ற படைப்புகள் வெளிவருவது பாராட்டப்படவேண்டிய ஒன்று!

English Summary:  

Book Title: Kiraganangalin Nilal Vilayaattu (Shadow Games of Eclipses)
Author: T. V. Venkateswaran
Pages: 64
Publisher: Bharathi Puththagalayam
Language: Tamil
Price: ~ Rs. 40/-
Age Group: 12+ 
Category: Science, Astronomy, History

கொஞ்சம் படிங்க பாஸ்! - பகுதி 4

நூலின் தலைப்பு: ஃபிரான்கென்ஸ்டீன் (Frankenstein)
ஆசிரியர்: மேரி ஷெல்லி
பக்கங்கள்: 352
வெளியீடு: பென்குவின் இந்தியா
மொழி: ஆங்கிலம்
விலை: < ரூ. 200/-
வயது: 15+
பொருள்: திகில், மெய்மையியல், கற்பனை

இயந்திர மனிதர்கள் சாத்தியம் என்று யாரும் கனவிலும் எதிர்பார்க்காத காலத்தில் (1818-ஆம் ஆண்டு) எழுதப்பட்ட நூல் இது. உலகறிந்த கவிஞர் ஷெல்லியின் மனைவி மேரி ஷெல்லி எழுதிய இந்நூல், வெறும் திகிலூட்டும் கற்பனைக் கதையாக நின்றுவிடாமல், ஆழ்ந்த மெய்மையியல்க் (philosophical) கேளிவிகளையும் முன்வைக்கிறது. அதாவது, 'மனிதனால் தன்னைப்போல சிந்திக்கும் திறன் உள்ள ஒரு உயிரை/எந்திரத்தைப் படைக்க முடியுமா? அப்படிப் படைத்தால் விளைவுகள் என்ன? அந்த சிந்திக்கும் திறன் உள்ள உயிரின் மனநிலை என்ன?' போன்ற கேள்விகளை இந்நூல் நம் மனதில் எழுப்புகிறது.

இன்றைய சூழலில், மேற்கத்திய திரைப்படங்களைத் தழுவி மசாலாப் படங்களை எடுத்து, எதோ பல்லாயிரம் ஆண்டுகள் தானே சிந்தித்துச் செதுக்கிய அற்புதப் படைப்பு என்று விளம்பரம் செய்து, காசு பார்க்கும் கூட்டமும், அந்தக் கூட்டம் எது சொன்னாலும் தலையாட்டும் ஆட்டு மந்தைக்கூட்டமும் பெருகியுள்ளன. ஆனால் வாசிக்கும் பழக்கம் இருப்பவர்களுக்கு "கருத்துக்கள் பிறப்பதும் இல்லை; அழிவதும் இல்லை. கருத்துக்கள் தலைமுறைதோறும் மேம்படுத்தவும், காலத்திற்கு ஏற்றாற்போல மாற்றியமைக்கவும் படுகின்றன" எனும் உண்மை புரியும்!

English Summary:  

Book Title: Frankenstein
Author: Mary Shelly
Pages: 352
Publisher: Penguin India
Language: English
Price: < Rs. 200/-
Age Group: 15+
Category: Horror, Philosophy, Fiction

கொஞ்சம் படிங்க பாஸ்! - பகுதி 3

நூலின் தலைப்பு: கம்யூனிஸ்ட் கட்சி அறிக்கை
ஆசிரியர்:  கார்ல் மார்க்ஸ், ஃபிரெடெரிக் ஏங்கெல்ஸ்
மொழிபெயர்ப்பாளர்: தேவ. பேரின்பன்
பக்கங்கள்: 108
வெளியீடு: நியூ செஞ்சுரி புக் ஹவுஸ்
மொழி: தமிழ்
விலை: ரூ. 25/-
வயது: 18+
பொருள்: அரசியல், சமூகம், பொது உடைமை

"கம்யூனிஸ்ட் கட்சி அறிக்கை" 1800களின் பிற்பகுதியில் எழுதப்பட்டது. அந்தக் காலத்தில் நிலவிய சூழலில் மார்க்ஸ் மற்றும் ஏங்கெல்ஸ் இருவரும் அறிவிப்பூர்வமாக தங்களின் சுயநலம் மற்றும் விருப்பு வெறுப்புகளுக்கு அப்பார்ப்பட்டு படைத்த இந்த அறிக்கை இன்றைய சூழலிலும் மிகவும் பொருத்தமாக உள்ளது. மொழிபெயர்ப்பாளர் தேவ. பேரின்பன் தற்காலத் தமிழில் எழிய நடையில் பொருள் குன்றாமல் இந்தனை நமக்கு வழங்கியுள்ளது மற்றொரு சிறப்பு. ஓட்டுப் போடாதவன் தேச விரோதி என்னும் அளவுக்கு பேசும் இளைய தலைமுறை, அரசியல் அறிவில் பரீட்சை வைத்தால் பாஸ் ஆகுமா? வெவேறு அரசியல் மற்றும் பொருளாதார முறைகள் மற்றும் சித்தாந்தங்கள் பற்றி 18 வயது நிரம்பிய அனைவருக்கும் தெரியுமா? அப்படித் தெரியாத நிலையில் போடும் ஓட்டு நல்லாட்சி வழங்குமா?

சோவியத் ஒன்றியம் சிதறிப்போன பின்பு முதலாளித்துவம் மட்டுமே முழுமுதல் பொருளாதார முறைமையாக கருதப்பட்டும் சூழலில் பிறந்த இளைய தலைமுறையினர் அவசியம் படிக்க வேண்டிய நூல். உழைப்புச் சுரண்டலும், லாப வெறியும் "நியாயம்" ஆகிப்போன சூழலில் இது எங்கே போய் முடியும் என்ற கேள்வி நம் அனைவரின் உள்ளும் எழுகிறது. இந்நூல் அதை ஓரளவு விவரிக்கிறது. கம்யூனிசம் பலரால் காலாவதியான ஒரு சித்தாந்தமாகப் பார்க்கப் படுகிறது. மற்றொரு பிரிவினரோ, அதை ஒரு மதம் போல வெகு கடுமையாகப் பின்பற்ற முயல்கின்றனர். ஆனால் மார்க்ஸும் ஏங்கெல்ஸும் இந்த அறிக்கை காலம் மற்றும் இடம் பொறுத்து மற்றம் அடைய வேண்டும் என்றே கூறுகின்றனர். ஆகவே இந்நூலை திறந்த மனதோடு வாசிப்பது நல்லது.

English Summary:  

Book Title: Communist Katchi Arikkai (Communist Party Manifesto)
Author: Karl Marx, Friedrich Engels
Translator: Deva. Perinban
Pages: 108
Publisher: New Century Book House (NCBH)
Language: Tamil
Price: Rs. 25/-
Age Group: 18+
Category: Politics, Society, Socialism

கொஞ்சம் படிங்க பாஸ்! - பகுதி 2

நூலின் தலைப்பு: எண்களின் கதை
ஆசிரியர்: த. வி. வெங்கடேஸ்வரன்
பக்கங்கள்: 56
வெளியீடு: பாரதி புத்தகாலயம்
மொழி: தமிழ்
விலை: < ரூ. 50/-
வயது: 10+
பொருள்: அறிவியல், கணிதம், வரலாறு

த. வி. வெங்கடேஸ்வரன் அவர்கள் பொதுமக்களிடம் அறிவியலை எடுத்துச்செல்லும் ஒரு தூதுவர் என்று சொன்னால் அது மிகை ஆகாது. நான் அவருடைய பல நூல்களை வாசித்துள்ளேன். இந்த நூல் என் எதிர்பார்ப்புக்குச் சற்று அதிகமாகவே என்னை வியக்கவைத்தது. வெறும் 56 பக்கங்களில் இவ்வளவு தகவல்களை அடக்க முடியுமா என்று இப்பொழுதும் வியப்பாக உள்ளது!

எண்கள் எப்படித் தோன்றின? வரலாற்றுக்கு முந்தய காலங்களில் இருந்த கணித முறைகள், வெவ்வேறு நாகரீகங்களில் தோன்றிய எண்கணித முறைகள், எண்களின் வரிவடிவம் என்று இந்த சிறய புத்தகம் பல அரிய தகவல்களை நமக்குத் தருகிறது. 6-ஆம் வகுப்புக்கு மேல் உள்ள குழந்தைகள் மற்றும் அனைத்து வயதினருக்கும் ஏற்ற புத்தகம். குறிப்பாக கணிதம் என்றாலே கசப்பு என்று நினைக்கும் கணித ஆர்வம் குறைந்த மாணவர்கள் அவசியம் படிக்கவேண்டிய புத்தகம். கணிதம் உங்கள் நண்பனே!

English Summary:  

Book Title: Engalin Kathai (Story of Numbers)
Author: T. V. Venkateswaran
Pages: 56
Publisher: Bharathi Puthakalayam
Language: Tamil
Price: < Rs. 50/-
Age Group: 10+
Category: Science, Mathematics, History

கொஞ்சம் படிங்க பாஸ்! - பகுதி 1

நூலின் தலைப்பு: Animal Farm (பண்ணை)
ஆசிரியர்: ஜார்ஜ் ஆர்வெல் (George Orwell)
பக்கங்கள்: 104 
வெளியீடு: பென்குயின் இந்தியா
மொழி: ஆங்கிலம்
விலை: < ரூ. 100/-
வயது: 10+
பொருள்: சிறுவர் கதை, அரசியல், சமூகம்

ஜார்ஜ் ஆர்வெல், பிரிட்டன் நாட்டைச் சேர்ந்த 20ஆம் நூற்றாண்டின் தலைசிறந்த எழுத்தாளர்களில் ஒருவர். அவர் ரஷ்யாவில் நிகழ்ந்த கம்யூனிச புரட்சியை அடிப்படையாக வைத்து ஒரு சிறுவர்களுக்கான கற்பனைக் கதையாக இந்த நூலை எழுதியுள்ளார். எளிய ஆங்கிலத்தில் இருந்தாலும் ஒரு நல்ல ஆங்கில அகராதியைத் துணைக்கு வைத்துக்கொள்வது நல்லது.

கதைச் சுருக்கம்:

விலங்குகள் மனிதர்களின் அடக்குமுறைக்கு எதிராக புரட்சி செய்து ஒரு பண்ணையைக் கைப்பற்றுகின்றன. ஆரம்பத்தில் ஆர்வத்துடன் ஒன்றுபட்டு உழைத்து முன்னேற்றம் காண்கின்றன. பின் தலைமைப் பொறுப்பில் இருக்கும் பன்றி இனம் மெதுவாக அடக்குமுறையைக் கையாள்கிறது. நாளடைவில், புரட்சியின் பொருள் மறந்து, பன்றிகளுக்கும் மனிதர்களுக்கும் வேறுபாடில்லாத நிலை ஏற்படுகிறது!

கருத்து:

தனியாக வாசித்தால் இது ஒரு நல்ல சிறுவர்களுக்கான கற்பனைக் கதை. அனால், ரஷ்யப் புரட்சியை மனதில்கொண்டு வாசித்தால், எப்படி அரசியல் அதிகாரம் சீரழிவிற்கு வழிவகுக்கிறது என்று சொல்லும் ஒரு சிறந்த அரசியல்/சமூக நூலாகவும் இது உள்ளது. இளைய தலைமுறையினர் அரசியல் அறிவு பெறவும், அவர்களின் சமூக சிந்தனையைத் தூண்டவும் இந்நூல் உதவும்.

English Summary:

Book Title: Animal Farm
Author: George Orwell
Pages: 104
Publisher: Penguin India
Language: English
Price: < Rs. 100/-
Age Group: 10+
Category: Children's Novel, Politics, Society

கொஞ்சம் படிங்க பாஸ்! - புதிய பகுதி ஆரம்பம்

வாசிக்கும் சிறுமி, ஃபிரிட்ச் வோன் யுதே [நன்றி: விக்கிமீடியா]

நூல்கள் வாசிக்கும் பழக்கம் நாளுக்குநாள் குறைவதும், தொலைகாட்சி மற்றும் கைபேசிகள் நம் ஓய்வு நேரத்தின் பெரும் பகுதியை வீணடிப்பதும் இன்று நாம் அனைவரும் அறிந்த உண்மை. "கொஞ்சம் படிங்க பாஸ்!" என்னும் இந்த புதிய பகுதி வாசிக்கும் பழக்கத்தை ஊக்குவிக்கும் விதமாக சில எளிய மற்றும் சுவாரசியமான நூல்களை உங்களுக்கு அறிமுகம் செய்யும். தமிழ் மற்றும் ஆங்கிலத்தில் வெளிவந்துள்ள சிறிய மற்றும் நடுத்தர அளவிலான, மலிவான, தரமான, சுவையான மற்றும் அறிவை வளர்க்கக்கூடிய புத்தகங்களை அறிமுகப் படுத்துவதே இந்தப் பகுதியின் நோக்கம்.

அனைத்து வயதினருக்கும் பொருந்துமென்றலும், இது குறிப்பாக இளம் வயதினரை மனதில் வைத்து எழுதப்படும் பகுதியாகும். இதில் ஏதாவது மாற்றங்கள், மேம்படுத்துதல்கள், குறை நிறைகள் இருக்குமாயின், எனக்குத் தெரிவிக்கவும். தொடர்ந்து வரும் பதிவுகளில் அவை சரிசெய்யப்படும்.

"கொஞ்சம் படிங்க பாஸ்" என்னும் தேடு சொல் (label) மூலமாக இந்த வரிசையில் வரும் பதிவுகளை நீங்கள் பார்க்கலாம். நூல்களை வாசித்து, அறிவைப் பெருக்கி, வளமான எதிர்காலத்தை வசமாக்குவோம்!